| |
| |
| Introducción. |
Cando en Abril de 1992 se celebrou a Asemblea Constituínte de Esquerda Nacionalista aprobaron-se os PRINCÍPIOS IDEOLÓXICO-POLÍTICOS, que foron ratificados pola 1ª Asemblea Nacional, celebrada o 12 de Marzo de 1994 en Monforte. Nesta 2ª Asemblea de EN imos recoller case que textualmente ditos princípios para que sirvan de corpo ideolóxico e de guieiro político ao novo xeito de organiar-se EN como Partido Político e assi reforzar mellor o BNG.
En Decembro de 1994 a Mesa Nacional de EN aprobou uns postulados de Actuación política a curto prazo nos que se recollia a conveniéncia de converter a EN nun partido político explicitando os seguintes argumentos:
- EN conta cun proxecto político, con princípios de actuación política próprios recollidos no documento fundacional Declaración de princípios Ideolóxico-Políticos que non é nen máis nen menos que un instrumento político perfeitamente válido para a constituizón dun partido nacionalista e de esquerdas.
- EN conta coa estrutura organizativa própria dun partido político, segundo quedou definida na Asemblea de Monforte.
- EN posui unha aceitábel implantación nos diferentes eidos sociais (profisionais, intelctuais, obreiros, empresários, mocidade, etc.) que garanten que o proxecto político proposto teña verdadeira incidéncia na sociedade galega. No futuro a implantación de EN na sociedade será moito máis ampla, xa que obxectivamente son moitas as persoas de esquerdas que desexan participar activamente no traballo político e non se senten representadas polas organizacións da esquerda estatal nen por outras opcións nacionalistas.
- Outro argumento para tomar EN a decisión de converter-se en partido político é a própria situación organizativa na que se topa o BNG, xa que no seu proceso de autoorganización, na próxima Asemblea abordará a sua legalización como asociación política. Sen predeterminar cal será o modelo organizativo do que finalmente se dote o BNG, coidamos que como mellor podemos contribuir a desenvolver o PROXECTO COMUN desde os presupostos de EN, é dotando-nos dunha estrutura organizativa que nos situe no proceso de debate e de responsabilidade política no mesmo plano de importáncia que os restantes partidos políticos que integran o BNG.
Ao reflexionarmos sobre o sentido dos partidos políticos nas sociedades destacamos que a vida democrática dos povos, mesmo na sua simples existéncia, non é factíbel nen ainda concebíbel sen a participación dos cidadáns e cidadás na actividade política. Este princípio, corroborado polo acontecer histórico, é tanto máis valedeiro cando un povo non dispón do libre exercício da sua soberania política como nación e tenciona loitar por acadá-lo. Eis a dobre razón de ser, democrática e nacionalista, da militáncia política para un cidadán galego.
A vertebración desa actividade na dimensión colectiva produce-se através de procesos de autoorganización en forma de forzas políticas próprias con cada un seu ideário e cada un sua base social: son os partidos políticos. Trascender organizativamente os lindes sociais e ideolóxicos da dimensión partidária, sen cair nunha amalgama uniformizadora, só se pode lograr mediante unha fórmula: unha frente que recoñeza e pratique o pluralismo, tanto nas coordenadas orgánicas como nas ideolóxicas.
Vai para trece anos que o sector da cidadania galega que optara pola fórmula frentista para vertebrar a sua militáncia política, redefiniu o modificou a concreción do modelo organizativo e máis as regras de convivéncia dentro da frente, mesmamente para garantir o pluralismo o o equilíbrio internos, e abordou un proceso de progresiva posta de prática efectiva desa formulación.
Dentre dese proceso convén que estexan acaidamente perfiladas as diferentes referéncias ideolóxico-políticas que, nas coordenadas ideolóxicas, programáticas e orgánicas da própria frente, compoñan o espectro plural da sua estrutura interna e aporten as definicións complementares para unha máis precisa situación dos diversos sectores da militáncia dentro do seu conxunto. Dese xeito arriquecerán-se as canles para a expresión e difusión das ideias e iniciativas de cada quen, fará-se máis doada a participación nos diversos procesos de toma de decisión e a veiculización e estimulo das actividades de pensamento e prática política da militáncia. En suma, consolidará-se a estrutura pluralista da frente e multiplicará-se o potencial de enerxia política que a fórmula frentista pode e debe xerar e proxectar no proceso de libertación da nación galega.
A esta finalidade arriquecedora e potenciadora do BNG vai orientada a decisión colectiva de constituir ESQUERDA NACIONALISTA como partido político dentro dos lindes políticos do BNG.
| |
|
|
