Na rúa o número 15 do noso voceiro Manesquerda. Interesantes son os temas que se abordan: Galiza Nova 2009; vivenda e xuventude; entrevista a Quico Paz Antón; a espera do Novo Estatuto; o BNG vintecinco anos despois; Independencia, Democracia e Socialismo; Nacións sen Estado (Palestina e Sahara); actividades de EN-Mocidade, etc.

Para recibilo no teu domicilio, liga con nós en mocidade@esquerdanacionalista.com.

A continuación, podes ler a EDITORIAL deste número.

Logo das eleicións municipais do 27 de marzo, e dende unha interpretación simplesmente cualitativa dos resultados, é obvio e incontestábel que a representación acadada polo BNG é de máximos históricos: 661 concelleiros e concelleiras ao longo de todo país. Mais non se debe caer na autocompracencia , xa que dende o punto de vista cualitativo baixáronse case que 10.000 votos. Especialmente preocupante semella a perda nas cidades, cuestión que se debera reflexionar moi afondo nos organismos pertinentes para tentar poñerlle freo. Cinxíndonos agora a cuestión meramente programáticas, dende EN-Mocidade parabenizamos os eixos vertebrais do Programa Marco co que o BNG se presentou a estes comicios: por unha banda, e baixo o epígrafe ”Construíndo a nación dende os concellos”, propio da concepción cívica do nacionalismo, téntase pular por un novo mapa administrativo máis acorde coa nosa dinámica socio-económica . No segundo punto chamado “Avanzando na mellora da calidade de vida”, o obxectivo preferente é o benestar das persoas, avanzando no camiño da igualdade coa educación, a vivenda e o emprego como principais preocupacións. En último termo,“Rexenerando a política e afondando na democracia participativa”, e recollendo de novo un dos nosos principios fundacionais, procurarase impulsar uns concellos máis transparentes e próximos ao cidadán e á cidadá. Dende EN-Mocidade consideramos primordial que estas cuestións non fiquen en papel mollado e que de verdade o BNG nos concellos sexa ferramenta útil para a construción nacional, aumentar o benestar das persoas e avanzar na calidade da nosa democracia dende unha perspectiva participativa. Tamén cremos conveniente recalcar que outras eleccións, as Xerais do 2008, están á volta da esquina. Dende EN-Mocidade incidimos en que o medre electoral e o afianzamento do nacionalismo galego no Parlamento do Estado non debe pasar pola asunción de políticas de orientación de tipo rexionalista e de carácter centrista. Debemos retomar o noso perfil soberanista e de esquerdas.

Noutra orde de cuestións, mostramos o noso malestar pola suba desproporcionada de taxas anunciada pola Consellería de Educación e Ordenación Universitaria, manifestamente inxusta se observamos que certos servizos ofrecidos son máis pobres, debido, por exemplo, á externalización de fotocopiadoras, aulas de Internet, comedores e a supresión de prazas residenciais. Tamén lamentamos a actitude do Partido Popular ao rachar ese consenso “de mínimos” sobre un tema tan crucial para o nosa nación como é o da lingua, escudándose perversamente en argumentos demagóxicos que nada máis que procuran a confrontación política gratuíta e que demostran unha vez máis que o PPdG é unha sucursal da recalcitrante e españolista extrema dereita madrileña.

Para finalizar, EN-Mocidade anímavos a ler este novo número do noso voceiro Manesquerda con contidos certamente interesantes, entre os que os que poderedes atopar un sobre a nova situación de Galiza Nova logo da X Asemblea Nacional; o BNG 25 anos despois; unha proveitosa entrevista ao deputado Quico Paz Antón ou reflexións sobre a dramática situación do Sahara e Palestina.